做咗 IT 支援同埋商務管理咁多年,我發現一個好玄學嘅現象:我哋幫客解決 System 問題、搞掂 HR 外判、執靚會計條數,公司效率高咗,但係坐喺 Office 嘅人,好似越來越難見到一個真心嘅笑容。
唔知由幾時開始,「快樂」喺職場變成咗一種「奢侈品」,甚至有人會覺得,返工講快樂直頭係「天方夜談」。如果你喺 Office 笑得大聲啲,可能仲會有人問你:「係咪好得閒?咁開心嘅?」呢種氣氛,其實好值得我哋反思。
快樂:我哋與生俱來、卻慢慢遺忘的能力
其實快樂呢件事,應該係我哋與生俱來嘅本能。你睇吓啲細路仔,一粒糖、一個公仔,已經可以笑到合唔攏嘴。但人越大,好似反而失去咗呢種能力。我哋被無數嘅 KPI、Deadline 同埋人際關係「磨平」咗,覺得返工就係要苦瓜咁嘅面,先顯得專業,先叫「捱過」。
為咗幫大家搵返呢種消失嘅能力,我寫咗一本書,名就叫《快樂中小管理》。
呢本書嘅核心其實好簡單,就係八個字:「與眾樂樂,常常喜樂」。
橫跨東西方古人的智慧:點解仲係咁難做?
「與眾樂樂」呢四個字,係出自中國古代聖賢孟子。佢當時同齊宣王講,一個人自己聽音樂開心,不如同其他人一齊聽音樂咁開心。呢個係一種「分享」嘅概念。
而「常常喜樂」,就係來自聖經入面嘅保羅。佢喺唔同嘅書信入面都強調,無論環境點樣,都要保持喜樂。
大家諗吓,一個係幾千年前嘅東方智者,一個係西方宗教嘅核心人物,佢哋橫跨咗時空同文化,竟然都係教大家同一件事:「要做個快樂嘅人」。但係最諷刺嘅係,咁多年嚟,世人似乎都做唔到。中外歷史咁長,人類好似仲係喺痛苦同壓力入面掙扎。快樂,真係咁難咩?
ASK IT LTD:點解核心價值唔係「賺錢」?
好多人會問我:「老闆,你開公司喎,你個核心價值竟然係『快樂』而唔係『賺錢』?你係咪嚟搞慈善㗎?」
我通常會反問同事一個問題:「你哋辛辛苦苦賺錢,係為咗咩?」有人會話為咗生存,有人話為咗供樓,有人話為咗屋企人。我再問深一層:「咁你生存、供樓、照顧屋企人,最終目標係咩?」答案最終都會歸納為同一個點:希望自己同身邊嘅人快樂。
既然「快樂」係所有嘢嘅最終目的地,點解我哋一定要假設,通往成功嘅路一定要佈滿荊棘同痛苦呢?通往世人眼中的成功,唔一定只有「委曲求全」或者「痛苦」呢條路。點解我哋唔可以喺過程入面,就已經獲得快樂?
喺 ASK IT LTD,我哋相信「快樂與分享」。自己快樂係一個層次,但將呢份快樂同人分享,嗰份喜悅係會翻倍嘅。當大家互相影響,呢個 Positive Vibes 就會喺公司內部形成一個循環。
客戶的快樂,建基於快樂的員工
呢個係我哋最硬淨嘅理念:一個唔開心嘅員工,係無可能提供到真正優質嘅服務。
如果我嘅同事係含住眼淚去執 Code、係充滿怨氣咁去幫客解決 IT 問題,個客係會感受得到嗰種負能量。所以喺 ASK IT LTD,我哋好保護同事嘅心理健康。
我哋有一套好特別嘅篩選機制:對於嗰啲需要同事「委曲求全」、或者要放棄尊嚴去服務嘅要求,我哋會好婉轉咁推咗佢。有人會覺得我哋大牌,但其實我哋係想維持一個健康嘅生態。我哋相信,快樂而理性嘅公司,會吸引到快樂而理性嘅客戶。
我哋唔係要做一單半單生意咁簡單,我哋更希望見到,用過我哋服務嘅客戶,唔單止係 IT 問題解決咗,而係成個人、成間公司都變到越來越快樂。
結語:快樂是一種選擇,也是一種管理
「快樂管理」唔係叫大家每日唔使做嘢,圍埋一齊嘻嘻哈哈。而係喺面對壓力同挑戰嘅時候,我哋選擇用一種「與眾樂樂」嘅心態去分擔,用「常常喜樂」嘅信念去堅持。
如果你都覺得職場生活太過壓抑,或者你都想為你嘅公司注入一啲快樂嘅動力,歡迎嚟同我哋倾吓。我哋未必可以幫你解決所有人生難題,但起碼喺 IT 同商務管理呢條路上,我哋可以同你一齊,「與眾樂樂,常常喜樂」。